Memorial
El pasáu 29 de Xunetu el Tribunal Europeu de Drechos Humanos (TEDH) aplicó l’artículu 39 del Códigu d’esti Tribunal por primer vez nel Cáucasu Norte, nun casu rellacionáu col secuestru, a cargu de persones ensin identificar, de Tamirlan Suleymanov, un vecín de Grozni.
Sigún esti artículu, el Tribunal ha imponer midíes urxentes específiques contra l’Estáu demandáu. Nel presente casu, estes midíes han dir encaminaes a garantizar la seguridá del fíu del demandante.
Fonte: http://www.themoscowtimes.com
Vladimir Ryzhkov, diputáu de la Duma Estatal de 1993 a 2007, plantea nesti artículu si Rusia merez ser un miembru del Conseyu d’Europa.
Les autoridaes ruses declararon un breve tiempu muertu nel so conflictu col Conseyu d’Europa y el so Tribunal Europeu de Drechos Humanos d’Estrasburgu.
El xueves, la Duma d’Estáu (parllamentu) decidió retrasar hasta la seronda la revisión d’un proyectu de llei que permitiría llibrar al Tribunal Constitucional, en dalgunos casos, de la so obligación d’acatar los fallos de los tribunales europeos contra Rusia. El proyectu de llei tamién faería más difícil que los ciudadanos rusos pudieren demandar al gobiernu n’Estrasburgu.
RIA Novosti
El Tribunal Européu de Drechos Humanos vién de condergar esti martes a Rusia al pagu d’un total de 130.000 euros pol secuestru d’un home chechenu y por nun investigar eficazmente la muerte de dos neños chechenos dempués d’un ataque con misiles.
El Tribunal conderga al gobiernu rusu a pagar 73.500 euros a los familiares de Khamid Mukayev, que foi secuestráu por militares rusos durante una operación de seguridá en Katyr-Yurt (República de Chechenia) en Setiembre de 2004.
Sigún fontes llocales, homes armaos del réximen títere na Chechenia ocupada secuestraron a 3 civiles.
Los díes 29 y 31 d’Ochobre, los kadyrovites llevaron a cau operaciones de castigu nes llocalidaes d’Argún y Agishty, nel distritu de Shali. Como resultáu de la operación, un vecín d’Argún y otru d’Agishty fueron prindaos y llevaos a un sitiu desconocíu. Dempués, atopóse a dambos secuestraos nun edificiu qu’abelluga a ún de los departamentos policiales de los collaboracionistes. Fueron forciaos a firmar confesiones sobre la su supuesta collaboración cola resistencia chechena al suministrar a éstos alimentos. Ellos negáronlo, pero dempués de tortures brutales, nun tuvieron otra que firmar tolos papeles que-yos apurrieron los kadyrovites. Les autoridaes títere anunciaron darréu que teníen capturaos a dos collaboradores de la resitencia chechena, a la que-y suministraron alimentos ente 1999 y 2001.
RIA Novosti
El Tribunal Européu de Drechos Humanos condergó esta selmana a Rusia al pagu de 207.000 euros a les families de delles persones que fueron prindaes poles fuercies de seguridá ruses na república norcaucásica de Chechenia.
Ataques esporádicos y enfrentamientos armaos son habituales nes repúbliques del Cáucasu Norte, onde Rusia llevó a cau dos guerres contra los independentistes en Chechenia.
Artículu asoleyáu en The Lancet, una de les principales espublizaciones médiques del mundiu
Casi 15 años dempués de qu’entamaren les guerres ente los independentistes chechenos y les tropes ruses, Chechenia y la su capital, Grozni, tán viendo nos últimos años unos esfuercios pa la su reconstrucción y una recuperación de la economía que dalgunos califiquen como “l milagru chechenu”. Mentantu, los incidentes violentos tán siendo, por desgracia, cada vuelta más constantes dende la guerra n’Osetia del Sur ente Xeorxa y Rusia que tuvo llugar n’Agostu. La cifra de muertes violentes comparaes coles del anterior branu casi se dobla, de 84 a 152(1).
El pasáu mes d’Abril les fuercies militares ruses punxeron fin oficialmente a lo que denominaben operación antiterrorista y que les organizaciones de drechos humanos consideraben “un sistema rexonal de tortura, confesiones forzoses y xuicios prefabricaos”.(2) Documentaes poles organizaciones de drechos humanos, asina como pola prensa nacional ya internacional, les fuercies ruses continúen coles sus práctiques de desapaiciones forzoses, tortura y otros tratamientos degradantes a los supuestos terroristes, al mesmu tiempu que les autoridaes ruses tán sufriendo una fola creciente d’asesinatos de los sus representantes pela parte d’insurxentes cada vuelta más organizaos.(3) Hasta’l 29 d’Ochobre de 2009, el Tribunal Européu de Drechos Humanos llevaba xulgaos más de 100 casos de ciudadanos chechenos nos que’l Gobiernu rusu nun acometió una investigación afayaíza nin persiguió los abusos contra los drechos humanos cometíos poles sus fuercies, o atopó a Rusia directamente por violaciones de los drechos humanos que van dende’l tratu inhumanu a detenciones secretes o muertes. Entá hai miles de casos pendientes.
Pilar Bonet, El País
Les actividaes de los grupos guerrilleros illegales y les desapaiciones en Chechenia aumentaron en 2009, pesie a l’abolición n’Abril del réxime contraterrorista vixente demientres 10 años n’aquel territoriu del Cáucasu rusu afectáu por dos guerres dende que la URSS se desintegrara en 1991.
Asina lo constata un informe del comisariu de Drechos Humanos del Conseyu d’Europa, Thomas Hammarberg, que s’asoleya güei n’Estrasburgu. L’informe, resultáu d’un viaxe a Chechenia ya Inguxetia del 2 al 11 de setiembre, afala a Rusia a clarificar les normes llegales vixentes nes operaciones de “llimpieza” contra les bandes armaes asina como a garantizar los drechos humanos durante les mesmes. El comisariu afala a les autoridaes ruses a “investigar de forma independiente” y “poner fin definitivamente” a práctiques como secuestros, desapaiciones, execuciones estraxudiciales, asesinatos, detenciones illegales y secretes. Estes práctiques fueron denunciaes poles ONG y tamién oxetu de demanda contra Rusia pela parte de los afectaos énte’l tribunal de Drechos Humanos d’Estrasburgu.
RIA Novosti
El Tribunal Européu de Drechos Humanos multó con 215.000 euros a Rusia pola desapaición de cinco persones na República de Chechenia, sigún un comunicáu del Tribunal asoleyáu’l pasáu xueves.
Aslanbek Ismailov, Aslan Ismailov, Khizir Ismailov, Yusi Daidayev y Yaragi Ismailov, vecinos de la llocalidá chechena d’Achkhoi-Martan, fueron prindaos por homes armaos y con uniformes de camuflaxe en Xineru de 2003, y nunca nun se supo más d’ellos.
La 43ª sesión del Comité de les Naciones Xuníes (NX) contra la tortura tuvo llugar en Xinebra ente los díes 2 y 20 d’esti mes de Payares. Como resultáu de la sesión, el Comité de les Naciones Xuníes contra la tortura confirma que la deportación de refuxaos chechenos puede suponé-yos a éstos un riesgu real de sufrir tortures.
Nesta 43ª sesión del Comité de les Naciones Xuníes contra la tortura, ésti debatió’l tercer informe periódicu de la República d’Azerbayán sobre la Convención contra la tortura y otros castigos o tratamientos crueles, inhumanos o degradantes. La representación d’Azerbaiyán formáronla 13 funcionarios del Estáu, y taba encabezada por Khalaf Khalafov, Viceministru d’Esteriores.
El Tribunal d’Estrasburgu acaba condergar a Rusia a pagar 130.000 euros pola desapaición nel añu 2000 de tres persones na República de Chechenia, sigún afirma un comunicáu de prensa asoleyáu esti xueves.
Los 3 casos referíense a denuncies de los demandantes de que los sus familiares allegaos desapaecieron en Chechenia dempués de ser deteníos por soldaos rusos, informó’l Tribunal Européu de Drechos Humanos.
asturieschechenia 