Tortura nes prisiones ruses de Medvedev

24 12 2011

Tortura na prisión de Volvográu en 2009
Artículu de Jeremy Putley

De cómo son trataos los presos na Rusia del presidente Dimitri Medvedev

Hai un principiu universalmente reconocíu, nos países gobernaos pol imperiu de la Llei, que diz que l’encarcelamientu que sigue a una condena ye tol castigu que la Llei permite. La tortura de los presos nun ye denguna parte del castigu que la sociedá demande. Pero na Federación Rusa, baxo’l mandatu de Dimitri Medvedev, esti principiu paez que nun s’aplica, teniendo en cuenta la evidencia de los numberosos casos de tortura que se dan, de los cualos ún de los más impactantes ye’l del presu chechenu Zubair Zubairaev.

Nun reciente reportaxe sobre procedimientos xudiciales asoleyáu nun periódicu francés, l’hestoriador chechenu Maerbek Vagachaev afirmó que “con o ensin garantíes, un chechenu que ye acusáu de matar a axentes de policía nun permanez vivu durante munchu tiempu nes cárceles ruses”. Zubairaev nun foi acusáu de matar a un policía, namás d’atacalu. Por esta ofensa, sigún una montonera de pruebes que lo demuestren, foi xabazmente torturáu durante un períodu prolongáu de tiempu. Les tortures que sufrió incluyeron que lu clavaren al suelu.

Ési ye l’informe del Secretariáu internacional de la Organización Mundial contra la Tortura:

Sigún la información recibía, n’Agostu de 2007 el señor Zubair Isaevich Zubairaev foi sentenciáu a cinco años de prisión a cumplir na colonia penal IAR-154/25 de Frilovo, na rexón de Volvográu, onde sufrió tortures por funcionarios d’esta prisión durante tol tiempu que tuvo presu allí. Les tortures incluyeron duros golpes, incluso con botelles de plásticu llenes, descargues elléctriques, inyección de sustancies desconocíes, que lu clavaren en suelu y tamién que lu obligaren a tar de pie na nieve colos pies desnudos. En delles ocasiones tamién sufrió confinamientos en celdes de castigu.

Tres les denuncies sobre la situación del señor Zubairaev, foi supuestamente treslladáu en Febreru de 2008 al hospital penitenciariu de la colonia penal BD-154/15, onde permanez tovía. Por embargu, sigún la mesma información, envede recibir cuidaos y tratamientu médicu afayaízos, foi oxetu otra vegada de tortura y otres formes de maltratu, como golpes recibíos supuestamente de manes del xefe del centru penitenciariu y del so subordináu inmediatu. El señor Zubairaev recibió tamién, supuestamente, amenaces d’internamientu nun centru siquiátricu. En Payares de 2008, el Fiscal rexonal de Volvográu inspeccionó l’hospital penitenciariu, pero supuestamente nun atopó faltes cometíes poles autoridaes de la prisión.

Sigún esa mesma información, la salú del señor Zubairaev ye estremadamente probe a causa de les graves llesiones na cabeza, y tá en peligru de sufrir epilepsia. Amás, tién nuna pierna graves feríes que nun acaben de curar. La so familia recibió fai poco amenaces de manes de, ente otros, un miembru del Serviciu Federal de Seguridá (FSB), por denunciar la situación de Zubairaev en delles ocasiones.

Amnistía Internacional investigó tamién el casu, y cuenta nun informe que:

A dellos oficiales de la prisión, asina como a un funcionariu de la Fiscalía Pública de Volvográu, se-yos acusa d’amenazar verbalmente a Zubair Zubairaev diciéndo-y que si nun dexa de denunciar el tratamientu que recibe en prisión, la so condena puede allargase o que podría incluso morrer “accidentalmente” en prisión. Tamién amenazaron a la so familia, afirmando que-yos “podría pasar dalgo” a les sos hermanes.

Les últimes noticies son que una activista polos derechos humanos -una de les poques persones valientes que investiga esti tipu de casos- llamada Elena Maglevannaia tá acusada, baxo l’artículu 152 del Códigu penal rusu, de delitos contra la protección del honor, supuestamente por difundir información sobre Zubar Zubairaev col fin de destruir la so reputación. La primer vista xudicial tá programada pal xueves 26 de Marzu, y tendrá llugar énte’l Xuez Asatiani nel tribunal del distritu de Kirovskiy, na rexón de Volvográu.

Tamos esperando con interés pol veredictu d’esti xuiciu. ¿Ordenará’l tribunal una investigación sobre les series y creíbles denuncies de tortures y otros maltratos aplicaos al señor Zubairaev? ¿O declararán culpable a Elena Maglevannaia de los cargos que-y imputen, condenándola a a dalguna forma de castigo como les que van xulgase esos díes en Volvográu? Ver veremos.

Advertisements

Aiciones

Information

Dexa un retruque

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s




%d bloggers like this: