APUESTE MULTIMILLONARIU EN FAVOR DE LOS MOZOS DE BRASIL PA GANAR LA PAZ EN DAGUESTÁN

1 08 2011

Shaun Walker, pa The Independent

Los proyectores tán prendíos, l’estadiu tá llenu, y a familiar figura rechoncha del campeón del mundu brasileñu Roberto Carlos galopa pela banda izquierda. Los estraño d’esta situación ye’l sitiu onde tién llugar: Makhachkala, capital de Daguestán. Un cachu de tierra montañosa na franxa sureña de Rusia, mirando al Mar Caspiu, nos últimos años Daguestán tá siendo conocía principalmente pola so probitú y violencia. La ruidosa insurxencia islámica anuncia víctimes casi a diariu ente los miembros de la policía y del gobiernu.

Esti añu, por embargu, un vieyu multimillonariu de la rexón anunció un plan d’inversión p’ayudar a driblar la probitú y la inestabilidá na rexón. La pieza central d’esti plan ye’l fúbol. Suleiman Kerimov, un reserváu home de negocios con inversiones en munchos sectores, ye’l 118º home más ricu del mundu, sigún la revista Forbes, con una fortuna de 5,5 billones d’euros. La so compañía prometío’l mes pasáu invertir más de 1 billón d’euros n’instalaciones deportives e infraestructures en Daguestán, y la inversión más visible hasta’l momentu ye l’Anzhi, l’equipu de fúbol de Makhachkala.

Kerimov garró l’Anzhi en Xineru, prometiendo fuertes inversiones. El mundu del fúbol quedó aturdíu cuando Roberto Carlos, ún de los xugadores más famosos del mundu, fichó pol equipu. Tres brasileños más y otros conocíos xugadores internacionales tamién ficharon por esti equipu.

La escasa asistencia a los partíos de casa convirtióse en llenos totales, y la xente peléase por una entrada. Tá planeáu un nueu campu pa dientro 4 años con una capacidá pa 40.000 espectadores, y qu’incluirá instalaciones d’entrenamientu, restaurantes, hoteles y spas, afirma Alexander Udaltsov, voceru del club. L’oxetivu ye clasificar al equipu, nos prósimos años, pa la másima competición europea, la Champions League, y pa ello l’equipu tá cimentando un puestu ente los seis meyores de la Primera División rusa.

Pero esiste otru oxetivu, quizás más ambiciosu, que ye usar el fúbol pa llevar un poco d’esperanza y felicidá a Daguestán. Sigún Udaltsov, “por supuestu, equí nun hai muncho colo que divertise en Makhachkala. Kerimov tién muncho interés en da-y a la xente dalgo de lo que sentise arguyosu”.

Les entraes pa los partíos tienen un preciu que van dende los 2 euros, y l’atmósfera qu’había el domingu pasáu cuando l’Anzhi recibió al Zenit de San Petersburgu, ún de los equipos cimeros de Rusia y campeón de la Europa League en 2008, yéra elléctricu. L’estadiu taba llenu, y los neños esguilaben peles paredes pa intentar ver l’interior, mientres centenares de polcíes acordonaben l’esterior pa evitar incidentes. Dientro l’estadiu, una banda de tamborileros animaben la tradicional danza lezginka, y el públicu glayaba al unísonu “Daguestán! Daguestán!”. El Zenit ganó’l partíu, inflinxendo la segunda derrota de la temporada al Anzhi, pero los siguidores d’ésti siguíen felices igual.

“Los xugadores que solíemos tener yéren basoria, y nun s’esforzaben” afirma Ali, un mozu de 19 años qu’afirma que vió tolos partíos de casa nos últimos tres años. Y añade “agora tenemos a Roberto Carlos. ¡Tovía nun soi quién a creelo!”.

De momentu, l’equipu tá en Makhachkala namás dos díes antes de cada partíu en casa. El restu la selmana tán nel so centru d’entrenamientu a les afueres de Moscú. El club niega que seya por razones de seguridá, sinon pola falta d’infraestructures en Daguestán. Cuando’l nueu Estadiu tea construyíu, l’equipu moveráse a Daguestán a tiempu completu, afirma Udaltsov.

El propiu Roberto Carlos, nuna entrevista con The Independent enantes del partíu, echó a reir con incredulidá cuando-y comentaron que Daguestán pudiere ser un sitiu peligrosu pa vivir. “Confío en Suleiman Kerimov, y él díxome que ye una rexón tranquila y segura, y que cola ayuda’l fúbol puede ser tovía meyor”, afirmó, mientres les suaves foles del mar llegaben a la playa que tá de lláu del Estadiu del Anzhi. “La violencia sobre la que s’escribe en dalgunos sitios d’internet ye cosa del pasáu, y nun tién na que ver colo que pasa agora”.

Pero, mientres la violencia en Daguestán tiende a dirixise cuidadosamente contra los miembros del gobiernu y la policía, la idea de que ye una rexón “tranquila y segura” na que la violencia ye cosa del pasáu, ye absurda. Dos díes antes de la entrevista, un altu cargu de los servicios de seguridá del FSB foi víctima d’un tiroteu e ingresó nel hospital n’estáu críticu, mientres dos de los sos guardaespaldes morrieron.

La tarde de la entrevista tuvo llugar una “operación especial” a una hora en coche al sur de la ciudá. Morrieron dos presuntos terroristes. La esposa d’ún d’ellos se cree que morrió mientres escapaba. Al día siguiente, lo único que foi posible ver foi un círculu de sangre seco nel barru qu’hai fuera la so casa, nel puntu onde resultó fería.

Llegó’l xefe de la policía local y enfrentáronse a él la madre y la hermana de la moza. “Ella echó a correr, y vosotros la matastis, ¡matastis a la mio hermana pequeña!” glayába-y una de les muyeres al policía mientres-y cayíen les llárimes pela cara. “¡Sois unos corruptos mentirosos!¡Oxalá Allah acabe con vosotros y la mesma desgracia caiga sobre los vuesos fíos tamién!”. Los guardaespaldes del xefe de policía garraben les sos armes nerviosamente.

El ciclu de violencia en Daguestán continúa. Ayeri, Magomedsalam Magomedov, xefe de prensa del Presidente de la República, foi asesináu nel so coche.

Les autoridaes tienen dicho delles vegaes que’l meyor camín pa evitar que la mocedá s’integre na insurxencia ye da-y oportunidaes económiques y esperanza. Deporte y “vida saludable” son espresiones repetíes como mantras de cómo mantener a la mocedá fuera de peligru, y la esperanza ye que’l “fenómenu Anzhi” va promover la cohesión social y l’arguyu na zona.

Ún de los oxetivos anunciaos por Kerimov ye que polo menos ún de los xugadores llocales del Anzhi forme parte de la selección rusa la Mundial de 2018, que va cellebrase en Rusia. Nos prósimos cinco años van abrise siete academies xuveniles en tou Daguestán pa promover a los xóvenes talentos, afirma Udaltsov.

Pero nun tol mundu tá impresionáu. Un artículu nel Chernovik, un periódicu llocal, apuntaba n’Abril que mentantu Roberto Carlos tién un salariu d’unos 4,6 millones d’euros per añu, un mayestru llocal en Daguestán gana ente 2300 y 2800 euros per añu. Pero pa la xente que va al estadiu, ye un preciu qu’hai que pagar. “Los rusos dicen qu’equí nun hai otra cosa qu’oveyes y terroristes” afirma Gadzhi, de 24 años d’edá, llevantando arguyosu una bandera y aplaudiendo. “Pues bien, tán equivocaos. ¡Tenemos al Anzhi!”.

Multimillonarios rusos nel fúbol

Suleiman Kerimov: Garró’l control del Anzhi en Xineru cola promesa de financiar al equipu. Sigún s’informa, acude a tolos partíos en casa y conversa col equipu.

Alisher Usmanov: Home de negocios rusu, pero nacíu n’Uzbekistán, ye’l 35º home más ricu del mundu y el principal accionista del Arsenal.

Roman Abramovich:
El pioneru de los “oligarques del fúbol”. Fizo la so fortuna col petróleu, y lleva invertíes millones de llibres nel Chelsea dende que lu adquirió en 2003.

Bulat Chagayev: Reserváu home de negocios chechenu que vién invirtiendo nel club llocal Terek Grozni, controláu pol presidente de Chechenia, Ramzan Kadyrov. Ruud Gullit tres dimitir dempués de dellos meses como entrenador, calificó la so temporada nel club como “demasiao estraña como p’atopar pallabres que la describieren”.

Advertisements

Aiciones

Information

One response

5 11 2011
Our

Pues es una apuesta bastante buena, asi que nada, veremos a ver en que termina porque no esta nada claro.

Dexa un retruque

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s




%d bloggers like this: